Emazteak politikan engaiatzeko kanpaina
2026ko herriko bozketen atarian, Euskal Elkargoak kanpaina handi bat abiatzen du: "Eta zu bazina?", emazteen ahotsa tokiko politikan bultzatzeko.
Euskal Hirigune Elkargoak proposatzen duen afixak, Marianne-en itxura duen emakumezko pertsonaia bat irudikatzen du, haren begiraradak ziurtasuna inspiratzen duelarik. « Emazteei dei egiteko eta engaiatzera bultzatzeko begia erakartzen duen kanpaina bat sortu nahi izan dugu. Erronka demokratikoa da! », dio Jean-René Etchegaray lehendakariak.
2000ko ekainaren 6ko legeaz geroztik, etengabe egin du aurrera emazteen presentziak tokiko exekutiboetan. Ipar Euskal Herrian, gaur egun, % 41ek dute kargua herrietan, eta % 31k Elkargoko kontseiluan. 2020an, 28 emazte-auzapez ere hautatu zituzten, 2014an berriz, 17 baizik ez zirelarik. « Aintzinamendu nabaria da, baina urrunago joan behar da! », azpimarratu du Martine Bisautak, Euskal Herriko Hirigune Elkargoko Emazteen eta Gizonen Berdintasunerako lehendakariordeak, zerrenda parekideetara loturik ez dauden herri ttikien atzerapena seinalatzen baitu.
Baina zenbakiek, bakarrik, ez dute jokoan dagoena laburbiltzen. « Haien ardurapean diren ordezkaritzak ere bada gaia », defendatu du Jean-Rene Etchegarayk. Zeren emazteen presentzia, ttikitzen da hierarkian igotzen garenean. Hautatu bezain laster, Euskal Elkargoko lehendakariak bidea erakutsi zuen, zortzi emakumezko pertsona izendatu baitzituen postu estrategikoetarako; batetik, gizartea eraldatzen ari dela erakusteko eta bestetik, politikan engaiatu nahi duten emazteei konfiantza eman behar zaiela argiki adierazteko.